يا روح اكتوبر الصاحية وبترفرف على قلوبنا في يوم العيد

يا فجر جديد

شق الليل ونورنا في دوارنا وقام الضهر من تاني

صحاني

غسل وشي بنداه الصابح ووضاني

فرد سينا وقال صلي

على روح اللي شال مدفع على كتفه

وقلب وسهم وبدمه رسم بلده

على صدره حكى حكايته...

حكاية عشق رباني اتولد في القلب موال

غناه..

ولسه لسانه مااتعلم يقول يامه ويامايه

غناه

لحد العشق ما اتشكل قصايد شوق واحلام

لحد العشق ما اتلون بلون الزرع والرغبة

هجر ناسه وشال فاسه وراح ع المهر متوكل

ضرب بايديه ولسه الناس بتتاوب

ونبت النخل يتمايل وشاقق الطريق للجاي

وآدي الشمس بجناحها تضمه ويا عود اخضر

وفوق الرملة متوضي سلاح الحق عطشان

لتكبيرة الصلاة يصلّي

ويصْلي الظلم من ناره

لضرب النار فتح صدره وعدّا لها

على تلالها..
سجد ع الرملة خضرها

رفع رايته بلون الدم والشوق

وغنالها..

راجعلك.. بعد طول البعد والفرقة

أضمك.. قلب يأويني من الغربة

وإن لف الرحيل اسمي
ولو صوتي هجر رسمي

هتلقيني

شعاع شمسك يدفيكي

في بدرالليل بناجيكي

في نجمة بعيدة باتهجاكي واكتبلك

بحبك.

أحمد خلف عبد الرحيم

شجر اللمون دبلان

" شجر اللمون دبلان على أرضه "

قبره شراقي

مدفون في ديل صبره

نعست عيون الشمس
والناعسة دايرة بالشعور وسط الخلايق
نشف الطريق عرقه
وانفضّ م السوق الحمير والحمّارين
والحمّالين
الضهر محني
والكفوف
تدبح رغيف العيش وتشرب ناره
على لمبة الجاز - ودخان القوالح
والوَشّ بيصفّر فــ ودن الدار وداير ع البيبان م الفجر
والريحة فايحة
من زلعة المشّ القديم
من زمان ما اتعوّد الفاس ع الأرض
والحمير ع الفلاحين
والسوق سواقي
والسواقي جفّ منها دمعها
تبات فــ حضن الخلا
والطير على خيره
والناعسة دايرة بالشعور وفــ حلقها
موال ومحشور
{شجر اللمون دبلان على أرضه
نشف الخَضَار م العروق
وانشلّ فيه جدره }
أحمد خلف عبد الرحيم

موقوتة

موقوتةٌ هي أحلامنا

أرواحنا الأسيرة خطوكم

..أقلامنا

..موقوتة

..هي

أحلامنا

أحمد خلف عبد الرحيم

مفعولون

مفعولون

ما بين الفُعّلِ والأفعال

..مفعولون

/ لا نملك غيرَ لسانْ

هضمته الرغبة في أحشاء الصحراء الحبلى

. بــ المفــااااااااااااعيل

***

/عين ثكلى

يلبد فيها الرملُ بليلٍ أو ببزوغ

............تنتصبُ

. ثم تزووووغ

***

/ قلبٍ

يركع فيهِ الليلُ ويسجدْ

يفنى في كروانه

يعلو يعلو يعلو

. ثم ينامْ

***

أحكام

لا تشهر للشمس رموشك حتى تبصرْ }

إن شاهدت شعاعا يوما

بينا... تمارس

لوح بلسانك

من نام على الخزّ ليس كمن سار على الوخز

{والأحضان الدافئةُ تورّث الأحلام

أحمد خلف عبد الرحيم

جتكم ثورة

جتكم واحد زي عرابي

راجل كده في الزمن الصعب

و فـ ساحة عابدين يتمطع

يجأر صوته بشكوة شعب

***

جتكم شيخ زي عمر مكرم

يأسر كل الناس حواليه

سيفه الحكمة تهز عروش

وتزلزل من باشا لـ بيه

***

جتكم زي زعيم الأمة

أو مصطفى كامل وفريد

قاضي محامي عالم عامل حر عنيد

ليه مهدورة كرامتنا والعدل شهيد

***

جتكم مصري راضع من نيلها

شارب شايها فـ حواريها

فارس فاسه طارح خيرها

وفـ وقت الشدة حاميها

***

جتكم يوم فتح الحسابات م الأول وتدور الدورة

جتكم يوم _ في الوقت الضايع _ تتعلموا من مصر الحرة

جتكم ثورة

أحمد خلف عبد الرحيم

arkhalef2002@yahoo.com

ديمقراطية مصر العربية

مصر بلدنا دي جمهورية

نفسنا تبقى ديمقراطية

***

من يوم ما عرفنا الطوابير

مش بنحازي غير على برّه

أمريكا وولاياتها الحرة

أحرار تمثال الحرية

أنصار الحزب الجمهوري

يوم .. والثاني ديمقراطية

طب ما نحازي مرة بجدّ

ونفصّل حزبين ع القدّ

يبقى أكيد الصفوة فـ كوم

والجماهير في الكوم الثاني

دا ديمقراطي .. ودا جمهوري

وسنعلن وبحسّ جهوري

( إن الشعب بكل فئاته

العايشين منهم أو ماتوا

هيبطّل يلعب جمهور )

يا سلام كده وبقدرة حاكم

يتغيّر دوغري الدستور

دستور الحكم الجمهوري

{تصبحُ مصرُ الحرةُ وطناً

ينعمُ بالديمقراطية}

تحيا مصر ديمقراطية

أحمد خلف عبد الرحيم

arkhalef2002@yahoo.com

حكومة الحكيم

حكمت حكومة الحكيم كان حكمها حكمة
حاكم حكومة الحكيم حاكمانا بالحكمة
***
حكمتها فيها الشفا لكل عقل رجيم
عكّر عقولنا البريئة بكلمتين ناعمين
فتّح عنين العيال وسمعنا ليهم صوت
يا بختة من داق دواها يرتاح مع المرتاحين
***
حكمتها رحمة ونور على كل نفس حقودة
ترقيها من حقدها ومن عنيها الحسودة
رقوتها متجربة قبل الزمان بزمان
تطلع في إيدها الروح بشيطانها , تطلع بتوبة
***
حكمتها فيها الفرج ,جنتنا فوق الأرض
طوق النجاة للغريق , وللمحرومين القرض
هيّ الدفا والأمان والبوصلة في التوهة
والروضة جوة القبور, والضل يوم العرض
***
حكمتها متودّكة لا تقول لا سين ولا جيم
خبرة في فن الخصخصة , والبيع في قوت الغلبانين
باعت ما باعت , ليه ؟ بكام ؟ دا الحد والمصلحة
غير الوصاية يا سلام , ويا بخته مين قال آمين
***
حكمتها حكمة مخلدة , أما الحكيم ذاته
حالف ليسقي حكمته حتى ان ما طالت حياته
تركة وإيه متقسمةفيها النصيب معلوم
دستوره سيفه قال كمان , والعدل كان من سماته!!
أحمد خلف عبد الرحيم
arkhalef2002@yahoo.com

إمتى تثور

نشف المداد بين السطور واتقشرت فوقها الكتاية

طلت ما بين حضن الورق كفي

بخيطان عناكب منسوجين ولا ملامح ناس غلابة

تاهت فـ عتمة لون شقاها خطوتي

فات كام قمر

فات كام محاق

غمّست فيه سن القلم

ينزف حنين .. يطرح كلام

وسط بحر الموج يخطط سكتي

و ادي الشراع فوق القلوع فارد

ينتفض فيّ بسكوت

يختلي بقلبي فـ سلام

يجنح في ظل الليل على شطي البعيد سارح

فايت بمواله القديم

يابن السبيل حوّد يضمك حيّنا

يابن السبيل مدّ الإيدين وابدر فدادين أرضنا

حبة أمل .. حبة ألم

حبة جنان تملى قلم

ترتاح على صدره قلوب المجروحين

تروي جدور عقل اللي مصلوب من زمن

تروي الحمام الاخضر غناوي الطيبين

وتشبّك الشمس (اللي تايهة ) في السما

مشتاق أنا

لسنابل الغلة تزرّع فوق جبيني

لسنابك الخيل تمرح في شراييني

لجناين النور .. تثور

ترمي شباكها ع الغيطان

تفتح بيبان الليل تطل بحلمها

من حقها

صوت حلمها .. يغزل خطاوي الشوق

ولو على صفحة ورق

يابن السبيل : نشف المداد بين السطور

إمتى تثور .. إمتى تثور ؟؟؟

أحمد خلف عبد الرحيم

arkhalef2002@yahoo.com

عيد بأية حال عدت ياعيد

يا شمس يا طالعة وطارحة جناحين وحبة دفا

وضحكة نسمة يتمايل

وقطفة فل

يا زغرودة في فم الواد وقلب البنت

وغنيوة على لسان الهنا بايتة في حضن الكل

***

يا شمس يا غازلة الشراع والشبك

يا شمس يا مرسى المحار والخير

يا نقطة مية تروينا

وكسرة خبز تطعم طير

اشمعنا في يوم العيد بتكفينا ؟؟
أحمد خلف عبد الرحيم
arkhalef2002@yahoo.com

بمناسبة حوادث افترا الظباط وضرب المواطنين

عجبي عليك يا قفا لما القلم بيرن

شيال حمول يا قفا لو كان جبل هيئن

يا خوفي يوم تنحني ما تنفرد تاني

وتنخ يا محترم ولا للكرامة تحن

********

عجبي عليه الجدع لما يقول الآه

ما تدري دي شكوته ولا دعا لله

يحيي نفوس رنخت وضميرها تايواني

يا ياخده في رحمته ومنهم لقضاه

********

عجبي علي المحبوسين والسجن براني

زنازين علي كل لون والحارس الجاني

فيها الشريف مستحي والبلطجي سيده

وذنبه انه افتري واتبلي علي الزاني

********

عجبي علي اللي علي باع واشتري فينا

نصب المزاد من زمان والورث كان لينا

نسي اللي هانت عليه العشرة من بدري

يسد عينا بترابه أو حتي يدعينا

********

عجبي علينا وعجب ولا العجب منا

لما يسيل البكا ع المربوطين بينا

نخاف وجنب الحيطان نمشي ونداري

لاحسن في ساعة القضا رجلينا تتحني

اأحمد خلف عبد الرحيم

arkhalef2002@yahoo.com

رباعيات عن الفاسدين

اسمع كلام الحق فيك في دماغك الفاضي
ياللي على الخلايق عامل لنا قاضي
تحكم وتتحكم فينا على راحتك
وكأن أرواحنا ملكك من الماضي
****
لإمتى ياللي عل كتافنا وراكبنا بالمقلوب
سايقنا مرة بعصاية والتانية بالمركوب
تكونش ياللي ابتديت - آخرتها مش باينة -
قدرنا من بختنا والوعد والمكتوب
*****
سايق عليك الجنيه والأوليا كلهم
الأخضر والأحمر يابيه واليورو من ضمنهم
ترتاح كفاية بقى دي الدنيا وما فيها
تاخد يومين بغددة وتتوب قوام بعدهم

احمد خلف عبد الرحيم

arkhalef2002@yahoo.com

بمناسبة تعليق أحمد نظيف عن الشعب المصري بأنه لم ينضج بعد ليتقبل الديمقراطية

شعب نونو
شعب نونو لسة بيوسخ هدومه
ماشي تايه في الشوارع لا هو رايح ولا راجع
كلمة بتوديه في ثانية كلمة بترده لجنونه
شعب نونو
لسة مااتعلمش يحبي وعينه رايحه ع الكراسي
لامم العالم بزنه هي لعبة ولا راسي ؟
فاكر الدنيا دي ملكه وربنا ما خلقش دونه
شعب نونو
ياما هنناه وياما كان عشاه هم وجانا
ياما رضعناه هوانا يا ما فطمناه بعدانا
ونكران الجميل في طبعه ملحنا وعيشنا يخونه
شعب نونو
شعب ما تعرفش ليه عينه طالعة ع الجنيه
هي ناقصاه القيافة والفلوس تجري ف إيديه
دي الحياة فانية ويا بخته اللي نام راضية عيونه
شعب نونو
قال وإيه آخر المتمة جاي يقول ديموقراطية
هي بزازة في بقة ولا دي خيبة قوية
لو مرض داير وصابه الدوا هانسقيهوله
شعب لولو
أحمد خلف عبد الرحيم
arkhalef2002@yahoo.com

لسة مسكالنا العصايا

لسه ماسكالنا العصايا
داحنا محتاجين رباية
قيدينا ..أدبينا ..جوه حضنك سلسلينا
داحنا مهما كبرنا من غيرك ولايا
ياللي ماسكالنا العصايا
******************
مين يقول ان القلم منك قسية
ولا تكشيرتك في خلقتنا قضية
ولا تكديرك وتأديبك خطية
دا انت خايفة علينا منا م البداية
ياللي ماسكالنا العصاية
******************
اوعي تسمحي لصوتنا يثور
ولا لعيوننا تفتح .. تشتهي غيرك أراضي أو بحور
مين نكون علشان نعاندك
أو عشان يملى الأمل فينا الصدور
ادعي لينا .. أو علينا ..واطلبي لينا الهداية
ياللي ماسكالنا العصايا
******************
نبقى مين علشان نقوم نصرخ في وشك
ولا بالمية نرشك
داحنا حتى ما نستاهلش دودك ومشك
ريحينا ..قوليلنا إيه آخر الحكاية
ياللي ماسكالنا العصايا

أحمد خلف عبد الرحيم
arkhalef2002@yahoo.com