ديمقراطية مصر العربية
مصر بلدنا دي جمهورية
نفسنا تبقى ديمقراطية
***
من يوم ما عرفنا الطوابير
مش بنحازي غير على برّه
أمريكا وولاياتها الحرة
أحرار تمثال الحرية
أنصار الحزب الجمهوري
يوم .. والثاني ديمقراطية
طب ما نحازي مرة بجدّ
ونفصّل حزبين ع القدّ
يبقى أكيد الصفوة فـ كوم
والجماهير في الكوم الثاني
دا ديمقراطي .. ودا جمهوري
وسنعلن وبحسّ جهوري
( إن الشعب بكل فئاته
العايشين منهم أو ماتوا
هيبطّل يلعب جمهور )
يا سلام كده وبقدرة حاكم
يتغيّر دوغري الدستور
دستور الحكم الجمهوري
{تصبحُ مصرُ الحرةُ وطناً
ينعمُ بالديمقراطية}
تحيا مصر ديمقراطية
أحمد خلف عبد الرحيم